ສະຫຼຸບ ແລະ ວາງແຜນພັດທະນາການສຶກສາ ໃຫ້ແກ່ຜູ້ອຳນວຍການໂຮງຮຽນ ຊັ້ນມັດທະຍົມສຶກສາທົ່ວແຂວງຫຼວງພະບາງ

ພະແນກສຶກສາທິການ ແລະ ກິລາແຂວງ ຫຼວງພະບາງ ສະຫຼຸບຕີລາຄາ ການຈັດຕັ້ງປະຕິບັດ ແລະ ວາງແຜນ ພັດທະນາການສຶກສາ ໃຫ້ເແກ່ຜູ້ອຳນວຍການ ໂຮງຮຽນຊັ້ນ ມັດທະຍົມສຶກສາ ເພື່ອເຮັດໃຫ້ ວຽກງານ ໃນຂະແໜງການສຶກສາ ແລະ ກິລາໃຫ້ມີ ຄຸນນະພາບ ແລະ ມີຜົນສຳເລັດ ໃນທຸກໆດ້ານ.

ເມື່ອ ວັນທີ 20 ເມສາ 2016 ຜ່ານມາ ທີ່ເຮືອນຮັບແຂກ ພະແນກສຶກສາທິການ ແລະ ກິລາແຂວງຫຼວງພະບາງ ໄດ້ຈັດກອງປະຊຸມ ແນະນຳການສະຫຼຸບ ແລະ ວາງແຜນການພັດທະນາ ການສຶກສາ ໃຫ້ແກ່ຜູ້ອຳນວຍການ ໂຮງຮຽນ ຊັ້ນມັດທະຍົມສຶກສາ ໃນທົ່ວແຂວງ.ໂດຍການໃຫ້ກຽດເຂົ້າຮ່ວມຂອງທ່ານ ເອິງ ລໍສະຫວັນ ຫົວໜ້າພະແນກສຶກສາທິການ ແລະ ກິລາ ແຂວງຫຼວງພະບາງ, ມີຫົວໜ້າຮອງຫົວໜ້າຂະແໜງການ ພະແນກສຶກສາທິການ ແລະ ກິລາ, ມີບັນດາຜູ້ອຳນວຍການ, ຮອງຜູ້ອຳນວຍການໂຮງຮຽນ ຊັ້ນມັດທະຍົມ ສຶກສາເຂົ້າຮ່ວມຈຳນວນ 111 ທ່ານ, ຍິງ 14 ທ່ານ. ໃນໂອກາດດັ່ງກ່າວ: ທ່ານ ເອິງ ລໍສະຫວັນ ຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ໄດ້ໃຫ້ຮູ້ວ່າ: ໃນສົກຮຽນ 2015-2016 ທົ່ວແຂວງ ຫຼວງພະບາງ ມີໂຮງຮຽນມັດທະຍົມຕົ້ນ 59 ແຫ່ງ, ຄູສອນ 1,403 ຄົນ, ມັດທະຍົມສົມບູນ 44 ແຫ່ງ, ຄູສອນ 798 ຄົນ ໃນນັ້ນມີຄູອາສາສະໝັກ ຊັ້ນມັດທະຍົມ ທັງໝົດ 491 ຄົນ, ປະຈຸບັນສະພາບການສະຫຼຸບ ແລະ ການຂຶ້ນແຜນພັດທະນາໂຮງຮຽນ ຂອງຜູ້ອຳນວຍການໂຮງຮຽນເຫັນວ່າ ບາງດ້ານຍັງບໍ່ສອດຄ່ອງ ໂດຍສະເພາະ ແມ່ນດ້ານສະຖິຕິ ຈຳນວນພົນ, ສະພາບການຮຽນ-ການສອນຂອງຄູບາງວິຊາແມ່ນບໍ່ຖືກຕາມວຸດທິຂອງຄູ ເນຶ່ອງຈາກວ່າບາງວິຊາ ຍັງມີຄວາມຈຳເປັນຕ້ອງການ ຄູສອນ ແຕ່ບາງວິຊາຊ້ຳພັດເຫຼືອອັນເປັນເຫດເຮັດໃຫ້ ຄຸນນະພາບການສຶກສາ ບາງເຂດຍັງຕ່ຳ ແລະ ແຕກໂຕນກັນຫຼາຍ. ສຳລັບກອງປະຊຸມດັ່ງກ່າວ ແມ່ນໄດ້ດຳເນີນໄປເປັນໄລຍະ 2 ວັນ (ວັນທີ່ 20-21 ເມສາ 2016) ໃນກອງປະຊຸມໄດ້ແນະນຳວິທີການເກັບກຳຂໍ້ມູນສະຖິຕິຕ່າງໆ, ແນະນຳການຂຶ້ນແຜນຄວາມຕ້ອງການຄູລາຍວິຊາ, ກວດກາບັນຊີ ລາຍຊື່ ຄູສອນມີໜ້າຕົວຈິງ ແລະ ຄູອາສາສະໝັກຂອງແຕ່ລະໂຮງຮຽນ, ແນະນຳກ່ຽວກັບຫຼັກການຄຸ້ມຄອງໂຮງຮຽນ, ແນະນຳການສ້າງແຜນພັດທະນາໂຮງຮຽນ ແລະ ການກະກຽມຄວາມພ້ອມຂອງ ການສອບເສັງຈົບຊັ້ນ ມໍ 4, ມໍ 7 ຂອງສົກຮຽນ 2015-2016.